15 அவள் மலர்ந்தாள்

பாவாடை சட்டையுடன்
பாடித் திரிந்தமயில்
தாவாணி சேலையுடன் நின்றாள்! - அவள்
தலைகுனிந்து நாணத்துடன் சென்றாள்!

தாவுகின்ற பம்பரம்போல்
தடதடென நடந்தஅவள்
போவதே தெரியாமல் போனாள்! - மெல்லப்
பூபோலக் கால்வைக்க லானாள்!

ஓங்கிவிழும் அருவியென
ஓசையுடன் பேசியவள்
தேங்கிநிற்கும் மௌனநதி யானாள்! - அவள்
சிரிப்பினிலும் அமைதியுரு வானாள்!

அலைபோலப் பார்வைகளை
அங்குமிங்கும் வீசியவள்
சிலைபோல நிலம்நோக்கு கின்றாள்! - ஏனோ
சிலபோது எனைநோக்கு கின்றாள்!

அப்படியே விரித்ததலை
ஆடையுடன் திரிந்தவள்தான்
ஒப்பனையில் மிகக்கவனம் கொண்டாள்! - அவள்
ஒயிலான தேர்போல வந்தாள்!

தம்பியுடன் தங்கையுடன்
சண்டையிட்டுத் திரிந்தவள்தான்
வம்பிழுக்கும் வேலையெல்லாம் விட்டாள்! - தன
மனதினில்ஓர் அந்தஸ்துப் பெற்றாள்!

தாய்சொன்ன வேலையெல்லாம்
தட்டிக் கழித்தவள்தான்
வாய்சொல்லி மூடுமுன்னே முடித்தாள்! - அவள்
வாழ்க்கையின் ஆரம்பம் படித்தாள்!

பாடத்தை மட்டுமே
பகலிரவாய்ப் படித்தஅவள்
கூடவே கதைநாவல் படித்தாள்! - தாய்
கூப்பிடச் சலிப்போடு முடித்தாள்!

முழுக்கண்ணால் எனைநோக்கி
முகம்மலரச் சிரித்தஅவள்
அரைக்கண்ணை இன்றுமறைக் கின்றாள்! - ஏனோ
மனக்கண்ணால் கண்டுரசிக் கின்றாள்!

எதிலுமொரு பரபரப்பு
வேகமென இருந்தவள்தான்
எதிலுமொரு மேன்மையைக் கொண்டாள்! - அவள்
எழிலான பெண்மையைக் கண்டாள்! 9840382003