9 ஆசைப் பட்டால் போதாது

ஆசைப் பட்டால் போதாது;
அடைந்து காட்டு!
நினைத்தால் மட்டும் போதாது;
நிகழ்த்திக் காட்டு!
கனவு கண்டால் போதாது;
கண்ணில் காட்டு!
வாயால் சொன்னால் போதாது;
செய்து காட்டு!

திட்டம் இன்றிப் பயணம் போனால்
திக்கெல் லாமும் இருளே!
திறமை இன்றி ஆசைப் பட்டால்
தெரியும் கானல் நீரே!
முயற்சி இன்றிக் கனவு கண்டால்
முடவன் கொம்புத் தேனே!
தோல்வி கண்டு துவண்டு போனால்
தோன்றும் எட்டாக் கனியே!

முட்டி முட்டி முளைக்கும் விதையின்
முனைப்பு வேண்டும்!
வெட்ட வெட்ட முளைக்கும் கிளையின்
வேகம் வேண்டும்!
தட்டத் தட்டத் தாவும் பந்தின்
தாகம் வேண்டும்!
பட்டுப் பட்டுப் படித்த பாடம்
பலிக்க வேண்டும்! 9840382003