6 அந்தத் துடிப்பு உனக்கும் இருந்தால்

வேலை தேடியே - வாடி
மெலியும் தோழனே!

எழுத்து கூட்டிப் படிப்பவன் கூட
எஜமான் ஆகிறான் நாட்டிலே! - நீ
எம்.ஏ. படித்து இன்னும் படித்து
ஏமாந்து நிற்கிறாய் ரோட்டிலே!
வேலை வேலை என்றே இருந்தால்
வீட்டுக்கு வருமா கூப்பிட? - நீ
விவரமாய் இருந்தால் விருந்தே வைக்கலாம்
ஊரெல் லாமும் சாப்பிட!

அப்பன் சொந்தத் தொழிலில் இருந்தால்
அவன்மக னுக்குக் கவலையில்லை!
எம்.பி., எம்.எல்.ஏ பழக்கம் இருந்தால்
எவன்மக னுக்கும் கவலையில்லை!
நோட்டை நீட்ட வசதி இருந்தால்
நூற்றுக்கு நூறு கவலையில்லை! - நீ
ஒன்றுமில் லாமல் படித்தி ருந்தால்
ஒருவ ருக்கும் பயனில்லை!

படித்தால் முதல்பத்துப் பேரில் ஒருவனாய்ப்
பாடத்தை நீயும் படிக்கணும்! - இல்லை,
பைக்கட்டைத் தூக்கித் தலைசுற்றி வீசிப்
பாதையை மாற்றிப் போகணும்!
உனக்கு வேண்டிய அறிவை நீயே
ஓடி ஓடித் தேடணும்!
உழைப்பால் உயர்ந்தவன் என்றபட் டத்தை
உலகம் உனக்குச் சூடணும்!

அரசுப் பணிதான் பாப்பேன் என்றால்
அதற்குள் வயசு போய்விடுமே! - நீ
அழுக்குப் படாமல் இருப்பேன் என்றால்
ஆயுசு முழுதும் தீர்ந்திடுமே!
உழைக்கும் தொழிலில் கௌரவம் பார்த்தால்
உருப்ப டாமல் போய்விடுமே! - நீ
ஒரேஎ மனதாய்த் தொழிலில் இறங்கு
ஊரில் கஷ்டம் நீங்கிடுமே!

பெட்டிக் கடைபோல் வைத்தவர் எல்லாம்
பெருந்தன வந்தர் ஆகலையா? - இங்கே
பிழைப்புத் தேடித் போனவர் எல்லாம்
பேர்புகழ் பெற்று வாழலையா?
சிறிதாய் ஒன்றை முதலில் துவங்கு
தெய்வம் துணையாய் நிற்காதா? - உன்
சிந்தை அதிலே செல்லச் செல்லச்
சிறந்த வழிதான் தோன்றாதா?

சொந்தத் தொழிலின் சுதந்தி ரத்தை
அனுப வித்துப் பார்க்கணும்! - நீ
தூக்க நடுவில் விழித்தால் கூட
தொழில்நி னைப்பு இருக்கணும்!
போட்டி போடும் உலகில் எதையும்
புதுமை யாகச் செய்யணும்! - உன்
புத்தியிலே முன்னேற் றந்தான்
பொழுது போக்காய் அமையணும்!

எந்தத் தொழிலும் இழிவில்லை என்ற
எண்ணத்தை இதயத்தில் ஏற்றுப்பார்! - நீ
இழிவாய் நினைக்கும் தொழிலில் கூட
இலட்சங்கள் புரள்வதை யோசிப்பாய்!
அற்பப் படிப்பு மனிதர்கள் அதிலே
அதிசயம் புரிவதை நேசிப்பாய்!
அந்தத் துடிப்பு உனக்கும் இருந்தால்
அற்புத வாழ்வைச் சந்திப்பாய்! 9840382003