26 ஒரு குறுங் குறுங் காவியம் நகைச்சுவை

சுருட்டை நாயனார் ஓட்டப் புராணம்!
******************************************************

சேமிப்புப் படலம்:
*************************
வாயைக் கட்டி வயிற்றைக் கட்டிச் சேமித்தார்!
மாதக் கணக்கில் வருடக் கணக்கில் சேமித்தார்!
சேய்கள் வாழ்க்கை சிறந்து விளங்கச் சேமித்தார்!
சேமித் துப்பின் மீதி யைத்தான் செலவிட்டார்!

பட்டே வேண்டாம் பருத்தி போதும் என்றாரே!
பஸ்ஸே வேண்டாம் நடையே போதும் என்றாரே!
கட்டில் வேண்டாம் தரையே போதும் என்றாரே!
கசாயம் போதும் டாக்டர் வேண்டாம் என்றாரே!

விளம்பரப் படலம்;
****************************
ஒலிபெ ருக்கி விளம்ப ரந்தான் செய்தானே!
ஒவ்வோர் வீடாய் நோட்டீஸ் போட்டும் வந்தானே!
தலைவ லிக்கும் அளவு கத்தி வந்தானே!
தாய்மார் தங்கள் கவனம் கவர்ந்து கொண்டானே!

'அதிக வட்டி அன்பி னாலே தருகின்றேன்!
ஆண்டி ரண்டில் அசலை இரண்டாய்த் தருகின்றேன்!
புதிய திட்டம் ஓடி வந்து சேருங்கள்!
போனால் வராது போனால் வராது சேருங்கள்!'

பணம் கட்டிய படலம்:
********************************
போட்டி போட்டு ஓடி வந்து கட்டினார்!
புருஷ னுக்கும் தெரியா மல்தான் கட்டினார்!
கூட்ட மாகக் குவிந்து வந்து கொட்டினார்!
குதூக லித்துக் கும்மி யடித்து முட்டினார்!

எம்.ஏ., பி.ஏ., படித்தோ ரெல்லாம் கட்டினார்!
இடாக்டர் வக்கீல் போலீ செல்லாம் கட்டினார்!
தும்மி னோரும் இருமி னோரும் கட்டினார்!
துண்டு போட்ட கரைவேட் டிகளும் கட்டினார்!

பணம் சேர்ந்த படலம்:
********************************
கோடி கோடி கோடி கோடிச் செல்வமே!
தேடித் தேடித் தேடித் தேடி வந்ததே!
ஓடி ஓடி ஓடி ஓடி வாங்கியே
பாடிப் பாடிப் பாடி வைத்தார் வீங்கியே!

எடுத்து வைக்க இடமில் லாமல்போனதே!
எண்ணி எண்ணி விரலில் எலும்பும் காணுதே!
படுக்கை கூட பணத்தின் மீதே ஆனதே!
பல்வி ளக்கப் பொடிம டிக்கப் போனதே!

மக்கள் கனவுகாண் படலம்:
*************************************
மாடி வீட்டைக் கனவில் கண்டு பாடினார்!
மகளக ழுத்தில் தாலி ஏற ஆடினார்!
ஓடிப் பஞ்சம் ஒழிந்த தென்று கூவினார்!
உடுத்திப் பட்டு மகிழ்வோ மென்று தாவினார்!

நாயனார் கனவுகாண் படலம்:
*******************************************
சிங்கப் பூரில் பாதி இடத்தை வாங்கலாம்!
சினிமா காரி கூட படுத்துத் தூங்கலாம்!
சிங்கக் கறியும் புலிப்பால் குடித்தும் வாங்கலாம்!
சிவனே என்று சிறையை விட்டு நீங்கலாம்!

ஓட்டப் படலம்:
**********************
பஞ்சாங் கத்தில் நல்ல நாளைத் தேடினார்!
பத்தி சூடம் சாம்பி ராணி ஏற்றினார்!
கொஞ்சங் கூட சந்தே கத்தை நீக்கினார்!
கும்மி ருட்டில் பூட்டிக் கம்பி நீட்டினார்!

ஐயோ ஐயோ ஐயோ என்றே அலறினார்!
அடிவ யிற்றில் அடித்துக் கொண்டு கதறினார்!
பொய்யாய்ப் போச்சே போச்சே என்று மறுகினார்!
பொத்பொத் தென்று தலையில் அடித்து உருகினார்!

போலீஸ் பிடித்த படலம்:
************************************
போலீ சுக்கும் கம்பெ னிக்கும் கூட்டிது!
போக்குக் காட்டி மோப்ப நாயும் பிடித்தது!
பாலீ சான பைனான் சியரும் சிக்கினார்!
பணத்தை வைத்த இடத்தை யெல்லாம் கக்கினார்!

பங்கு வைத்த படலம்:
********************************
பத்தி லொன்று போலீ சுக்குச் சென்றது!
பத்தி லொன்று நீதித் துறைக்குச் சென்றது!
பத்தி லொன்று அமைச்ச ருக்குச் சென்றது!
பத்தி லொன்று பத்தி ரிக்கை தின்றது!

பத்து நாளாய்ப் படத்தைப் போலக் காட்டினார்!
பரப ரப்பை விறுவி றுப்பை ஊட்டினார்!
பத்து நாளில் அடுத்த செய்தி மாற்றினார்!
பாவி மக்கள் தாமும் மறந்தே தேற்றினார்!

(வேறு)
மூட்டை யளவு போட்ட வர்க்கு முட்டை யளவு கிடைத்தது!
கோட்டை யளவு போட்ட வர்க்குக் கொட்டை யளவு கிடைத்தது!
பாட்டை எண்ணிப் பார்த்தோர்க் கெல்லாம் பட்டை நாமம் கிடைத்தது!
நோட்டை எண்ணி நாய னாரும் நுங்கு தின்று வாழ்கிறார்!

சுபம்! சுபம்! சுபம்! 9840382003