42 சிகரெட்

இன்னுமா புகைக்கின்றாய்? - நீ
இன்னுமா புகைக்கின்றாய்?

அன்று தாய்சொன்னாள் கேட்கவில்லை!
அடுத்து மனைசொன்னாள் கேட்கவில்லை!
இன்று மகன்வந்து சொல்லுகின்றான்! - நீ
என்ன செய்வாயோ தெரியவில்லை!

இரண்டு சிகரெட்டில் ஆரம்பித்தாய்! - இன்று
இருபத் தைந்திற்கு வந்துவிட்டாய்! - இது
ஒருபிள்ளை வளர்ப்புச் செலவாகும்! - நீ
ஊதிக் கெடுப்பது புகையாகும்!

அழகுக் கென்று ஆரம்பித்தாய்! - அது
அடிமை யாக்கும் தெரியவில்லை!
பழகும் நட்புக் காரம்பித்தாய்! - அது
பலிகடா வாக்கும் தெரியவில்லை!

வட்ட வட்டமாய்ப் புகைவளையம்
வானில் பறக்க ஊதுகின்றாய்!
திட்ட வட்டமாய்ச் சொல்கின்றேன்! - அது
சிரத்திற்குச் சுருக்கு வளையமடா!

சிகரெட் ஊதிய வாயோடு
திரும்பி மனைவியின் வாயோடு
மகிழ்ந்து முத்தம் தருகின்றாய்! - இது
வன்கொடு மையன்றி வேறென்ன?

மலத்தில் நெளியும் புழுக்களுக்கு
மலத்தின் நாற்றம் தெரிவதில்லை!
இழுத்துப் புகைக்கும் உங்களுக்கு - அதன்
ஈன நாற்றம் புரிவதில்லை!

பிஞ்சுக் குழந்தைக்குச் சேராது! - புகை
பெரியவர் களுக்கும் ஆகாது! - இதைக்
கெஞ்சிக் கதறிச் சொன்னாலும் - உங்கள்
காதுக்கு மட்டும் ஏறாது!

முக்கி முனகி நோயாலே
மூச்சுத் திணறிச் சாகின்றாய்! - உன்
பக்கம் நின்ற பாவத்திற்கோ
பாதிநோய் எனக்கும் தருகின்றாய்?

நரம்பைக் கொஞ்சம் தூண்டிவிடும்! - அது
நாசத்தை உள்ளே ஊன்றிவிடும்!
இரும்பு போன்ற தேகத்தையும் -அது
இற்றுப் போகச் செய்துவிடும்!

சிந்தையி லேஒரு சுறுசுறுப்பு - உன்
செய்கையி லேஒரு விறுவிறுப்பு
வந்து விட்டது போலிருக்கும்! - ஆனால்
மந்தமே இறுதியில் மீந்திருக்கும்!

புகைத்தால் கிடைக்கும் இலாபங்கள்
பொய்யென் றுணர மாட்டாயா?
நகைத்தால் அந்த நேரத்தில்
நன்மை கோடி கேட்பாயா?

ஈரல் வெந்து போகுமடா!
இரைப்பை நொந்து சோருமடா!
மார டைப்பும் நேருமடா!
வாயில் புற்றும் தோன்றுமடா!

இன்றே நிறுத்தி விட்டாலும் - உன்
இரத்தத்தில் சேர்ந்த இரசாயனங்கள்
நின்றே இருக்குமாம் பத்தாண்டு! - இது
நினைத்துப் பார்க்கவே கொடுமையன்றோ?

சிறிய சிறிய சிகரெட்டால்
பெரிய பெரிய நோய்வாங்கி
நிறைய நிறையச் செலவிட்டும்
நிம்மதி காண முடியாது!

நிம்மதி யாய்நீ போய்விடுவாய்!
நிர்க்கதி யாவதுன் வீடல்லவா?
சம்மதித் தின்றே விட்டுவிடு! - நீ
சாதிக்க வேண்டும் முட்டிஎழு! 9840382003